संसदमा नाकाबन्दीको विरोध, भारतीय राजदूत रे लाई फिर्ता पठाउन माग गर्दै नाराबाजी

आइतबारसम्मका लागि संसद बैठक स्थगित

काठमाडौ, १५ मंसिर । भारतको सहयोगमा
मधेसमा आन्दोलन गरिरहेका संयुक्त लोकतान्त्रिक
मधेसी मोर्चाका सांसदहरुकै अगाडि
व्यवस्थापिका संसद बैठकमा नाकाबन्दीको
विरोध भएको छ ।
सत्तासमर्थक दलका सांसदहरुले उठेर भारतले नेपालको
अन्तरिक मामिलामा हस्तक्षेप गरेको भन्दै संसदमा
नाराबाजी गरेपछि मोर्चाका सांसद छक्क परेका
छन् । जबकी मोर्चाका सांसदहरु भारतको
मागजस्तो माग पुरा गर्न माग गर्दै संसद बैठकमा
निरन्तर नाराबाजी गरिरहेका छन् र अवरुद्ध
गरिरहेका छन् ।
संसदको बैठक सुरु हुनेवित्तिकै रोष्टम घेराउ गरेका
मोर्चाका सांसदको मागविरुद्ध सत्तासमर्थक दल
नेपाल मजदुर किसान पार्टीका सांसदले भारतको
विरोध गर्दै नाराबाजी गरेका थिए ।
नेमकिपाका सांसदहरु प्रेम सुवाल र अनुराधा थापा
लगायतले ‘आत्मसर्मपण गर्दैनौं, नेपालको
संविधानमा हस्तक्षेप गर्ने भारत को हो ?
सुनसरीमा गोली हान्ने भारतीय प्रहरीलाई
कारबाही गर’ जस्ता नारा लगाएका थिए ।
उनीहरुले भारतीय राजदूत रञ्जित रेलाई तत्काल
फिर्ता पठाउनसमेत सरकारसँग माग गरे ।
‘नेपालविरुद्ध बोल्ने भारतको दूतलाई तुरुन्त
फिर्ता पठाउनुपर्छ,’ उनीहरुले भने ।
यसैबीच मधेसी मोर्चाको लामो नाराबाजीका
बीच संसद बैठक आगामी आइतबारसम्मका लागि
स्थगित भएको छ । मोर्चाका सांसदले मात्रै
संसदमा आधा घण्टासम्म नाराबाजी गरेका थिए ।
नाराबाजी नरोकिएपछि सभामुख ओनसरी घर्तीले
२० गते आइतबार १ बजेसम्मका लागि बैठक स्थगित
भएको घोषणा गरिन् ।