कर्मचारीलाई मन्त्री शर्माको निर्देशन- चाकडी छाड्नुस्, जनताप्रति उत्तरदायी हुनुस्

मन्त्रालयका सचिवलाई कम्तिमा तीन वर्षसम्म सरुवा नगर्न प्रस्ताव
रेखा शर्मा, सामान्य प्रशासन मन्त्री । फाइल तस्बिर
२५ फागुन, इलाम । सामान्य प्रशासन मन्त्री रेखा शर्माले मन्त्री वा सचिवप्रति भन्दा जनताप्रति उत्तरदायी भएर काम गर्न कर्मचारीहरुलाई निर्देशन दिएकी छन् । कुनै एउटा मन्त्रालयको सचिवलाई कम्तिमा तीन वर्षसम्म सरुवा गर्न नपाइने प्रस्ताव मन्त्रिपरिषद बैठकमा आफूले राखेको उनले जानकारी पनि दिइन् ।
जिल्ला विकास समिति इलाममा कर्मचारीहरुसँग मंगलबार गरिएको अन्तरक्रियामा मन्त्री शर्माले आफूभन्दा माथिल्लो पदको कर्मचारीको चाकडी गर्ने मानसिकता त्याग्न आग्रह गरिन् ।
‘सरुवा-बढुवाका लागि मन्त्री वा सचिवलाई रिझाउनुपर्छ भन्ने मानसिकता त्याग्नुस्,’ मन्त्री शर्माले भनिन्, ‘म पनि ऐन नियममा भएका त्यस्ता खालका बाध्यतात्मक व्यवस्था हटाउने प्रयासमा छु ।’
कर्मचारीहरुले आफ्नो राजनीतिक आस्था अनुसारको मन्त्री भए राम्रोसँग काम गर्ने र मन्त्रीहरुले पनि आफ्नो दल निकटको कर्मचारीलाई अप्ठ्यारोमा पार्ने कामको आफू सधैं विरोधी भएको मन्त्री शर्माले स्पष्ट पारिन् ।
‘राजनीतिक दल हरेर काम गर्ने वातावरण हटाउनुपर्छ । हामी पनि त्यसका लागि तयार छौं,’ मन्त्री शर्माले भनिन्, ‘मन्त्री फेरिँदाबित्तिकै कर्मचारीहरुलाई पनि हेरफेर गर्नुपर्छ भन्ने कुराको म सधैं विपक्षमा छुँ ।’
कुनै एउटा मन्त्रालयको सचिव वा कर्मचारीलाई कम्तिमा तीन वर्षसम्म लगातार काम गर्न दिनुपर्ने पक्षमा आफू रहेको उनले बताइन् । राजनीतिक र प्रशासनिक द्वन्द्व अन्त्य गर्ने तथा कर्मचारी प्रशासनलाई सिस्टममा चलाउने प्रयासमा आफू रहेको उनले जानकारी पनि गराइन् ।
कर्मचारी भन्छन्ः हाम्रा छोरा-छोरीलाई सरकारी स्कुलमा पढाऔं
अन्तरक्रियामा इलामका अधिकांश सरकारी कार्यालयका प्रमुखहरु सहभागी थिए ।
कार्यक्रममा इलामका प्रमुख जिल्ला जनकराज दाहालले निष्पक्ष भएर जनताको सेवा गर्न आफूहरु तयार रहेको बताए । उनले इलाम जिल्लाका कर्मचारीहरुलाई पनि निष्पक्ष र जनताप्रति उत्तरदायी भएर काम गर्न निर्देशन दिए ।
स्थानिय विकास अधिकारी मदन कोइरालाले एउटा गाविस सचिवले दुई-तीन वटा गाविस हेर्नुपर्ने बाध्यता भएकाले कार्यसम्पादनमा अप्ठेरो भएको जानकारी गराउँदै गाविस सचिवको पर्याप्त दरबन्दीको व्यवस्था मिलाउन आग्रह गरे ।
जिल्ला न्यायाधिवक्ता रिद्धिनाथ निरौलाले कर्मचारीको सेवा सुविधा बढाउन र सबै कर्मचारीहरुले आफ्ना छोरा-छोरीहरुलाई सरकारी स्कूलमा पढाउनुपर्ने बाध्यात्मक व्यवस्था मिलाउन सुझाव दिए ।
जिल्ला जनस्वास्थ्य कार्यालय प्रमुख राजकुमार पोख्रेलले इलाम जिल्ला अस्पताललाई विशेषज्ञ सहितको अस्पताल भनिए पनि विशेषज्ञको अभाव भएको जानकारी गराउँदै स्वास्थ्य संस्थामा छाता ऐनको अभाव भएकाले त्यसको व्यवस्था मिलाउन सुझाव दिए ।
इलाम नगरपालिकाका कार्यकारी अधिकृत महेन्द्र खाम्याङले कर्मचारीहरुको वृत्ति विकासमा जोड दिन आग्रह गरेका थिए ।