सरकारले धेरै सहिसक्यो, अब सहँदैन : ओली

पुस ६, २०७२- प्रधानमन्त्री
केपी शर्मा ओलीले
आन्दोलनका नाममा भएका हिंसा,
तोडफोड, आगजनी र देशविरुद्धकै
अभिव्यक्तिलाई सरकारले धेरै सहिसकेको
भन्दै अब नसहने बताएका छन् ।
‘आन्दोलनका नाममा भएका धेरै हिंसा,
आगजनी, सरकार र देशविरुद्धकै
अभिव्यक्तिहरु हामीले सह्यौं, अब
सरकारले सहँदैन, कारबाही गर्छ,’ उनले भने
।
‘शान्तिपूर्ण आन्दोलन भन्ने अनि
चौकीमा आक्रमण गर्ने, आगो लगाउने ?
अनि तिनलाई कारबाही गर्यो भने दमन
गऱ्यो भन्ने ?’ उनले भने । सुनसरी एमालेको
जिल्ला परिषद् उद्घाटन समारोहमा
बोल्दै उनले भने, ‘हिंसात्मक आन्दोलन हुँदा
सरकारले केही नगरी हेरेर मात्रै बस्नु पर्ने
हो ?’
मोर्चाका नेताहरुले आफ्नो
राजीनामा मागेकोतिर संकेत गर्दै उनले
आफूलाई मत नदिनेले राजीनामा माग्न
पनि नमिल्ने बताए । ‘मेरो राजीनामा
माग्नका लागि मलाई भोट दिएको
हुनुपर्यो नि । भोट नदिएकाले
राजीनामा माग्नुको कुनै अर्थ छैन ।’
हिजो राजधानीमा भएको एक
कार्यक्रममा फोरम अध्यक्ष उपेन्द्र
यादवले प्रधानमन्त्रीले राजीनामा
दिनुपर्ने बताएका थिए ।
जिल्ला परिष्दमा बोल्दै ओलीले
कांग्रेसलाई आफ्नो सरकारमा सहभागी
हुन आह्वान गरे । ‘कांग्रेसजस्तो परिपक्व
पार्टीले अपरिपक्वता देखाउनु हुँदैन । हठ
त्यागेर सरकारमा आउनुस् । जनताले सबै
पार्टी मिलेको हेर्न चाहेका छन्,’ उनले
भने । कार्यक्रममा एमाले महासचिव
इश्वर पोखरेल, सचिव भीम आचार्य,
केन्द्रिय सदस्य जीवन घिमिरेलगायतले
बोलेका थिए ।