पूर्व युवराज पारसलाई देखेर बगलामुखीमा लाग्यो ‘राजा आऊ देश बचाउ’ को नारा

पूजापाठ गर्न बहिनीसँग बगलामुखी पुगे पारस

काठमाडौँ, २६ मंसिर । भारतको नाकाबन्दी नेपाली जनताले किन
सहने भन्दै प्रश्न गरेका पूर्व युवराज पारस शाहले शनिबार साँझ
ललितपुरस्थित बगलामुखी मन्दिरमा पूजापाठ गरेका छन् ।
बहिनी प्रेरणासँगै मन्दिर पुगेका पारसलाई देखेपछि उनका समर्थकहरुले
‘राजा आऊ देश बचाउ’, ‘हाम्रो राजा हाम्रो देश, प्राणभन्दा
प्यारो छ’ भन्दै नाराबाजी गरेका थिए । पारसले शनिबार
पञ्चबलि तथा मंसिर विशेष पूजा गरेका हुन् ।
लामो कपाल बाँधेर आएका पारसले बगलामुखी भजन मण्डलीले
आयोजना गरेको पूजाको प्रसाद पनि ग्रहण गरे । पूजापाठ
कार्यक्रममा सेना र प्रहरीका उच्च अधिकारीहरु पनि उपस्थित
थिए ।
यसअघि भारतीय नाकाबन्दीविरुद्ध मुख खोल्दै पारसले ‘धर्म
गुमायौ, राजा गुमायौ, अब ग्यास गुमाएर दाउराको चुलो पनि
पाएनौं, नेपाली जनताले किन सहने’ भन्दै प्रश्न गरेका थिए ।