थ्रीस्टारलाई स्तब्ध पार्दै आर्मी सेमिफाइनलमा

रुस्लान थ्री स्टार क्लबलाई स्तब्ध पार्दै साविक बिजेता त्रिभुवन आर्मी क्लब सिमरामा जारी रुस्लान सातौं सिमरा गोल्डकपको सेमिफाइनलमा प्रवेश गरेको हो । सिमरा रंगशाला सोमबार भएको क्वार्टरफाइनल खेलमा लिग बिजेता थ्रिस्टार क्लबलाई पराजित गर्दै आर्मी अन्तिम चारमा प्रवेश गरेको हो ।
लिग उपबिजेता समेत रहेको आर्मीलाई अन्तिम चारमा पुर्याउने क्रममा विकास तामाङले निर्णायक गोल गरे । पहिलो हाफको इन्जुरी समयमा बिमलको कर्नरबललाई सदुपयोग गर्दै विकासले गरेको गोल निर्णायक बन्न पुग्यो ।
खेलको सुरुवातदेखी आक्रामक खेल खेल्दै आर्मीले थ्रीस्टारलाई दवावमा राखेको थियो । खेलको सुरुवातदेखिनै आपसी तालमेल मिलाउन नसकेको थ्री स्टारले अवसर सिर्जना गर्न नसक्दा पहिलो हाफ १–० को स्थितीिसकिएको थियो ।
थ्री स्टारलाई लगातार दवावमा राखेको आर्मीका नवयुग श्रेष्ठ खेलको ७८ मिनेटमा घाईते हुदै मैदान छाड्नुपरेको थियो । थ्रिस्टारका पिटर सेगनले बल हान्ने क्रममा जुत्ताले लागेर नवयुगको टाउकोमा चोट लागेको हो ।
खेलको अन्तिम समयसम्म पनि आर्मीबिरुद्ध राम्रा अवसर बनाउन नसकेको थ्री स्टारले खेलको ८६ औ मिनेटमा पेनाल्टीबाट खेल बराबरी गर्ने मौका चुकायो । आर्मीका विकास तामाङले सेगन ईतापायोलाई डिबक्सभित्र लडाएपछि पाएको पेनाल्टीमा थ्रिस्टारका पिटर सेगन गोल गर्न चुके ।
पिटरको प्रहारलाई आर्मीका गोलरक्षक बिकेश कुथुले बचाउ गर्दै टिमको जित सुनिश्चित पारेका थिए ।
टिमको पराजयपछि स्तब्ध बनेका थ्री स्टारका प्रशिक्षक राजेन्द्र तामाङले खेलाडीले सोचेजस्तो प्रदर्शन गर्नै नसकेको बताए । आर्मीको खेल आफ्नो टिमको तुलनामा निकै राम्रो रहेको उनको भनाई थियो । आर्मीका प्रशिक्षक मेघराज केसीले जितबाट खुशी भएपनि केही राम्रा अवसर चुकाउन पुग्दा अन्तिम समयसम्म संघर्ष गर्नुपरेको बताए । खेलको म्यान अफ दि म्याच आर्मीबाट खेलेका बिमल घर्तीमगर घोषित भए ।
Setopati बाट